هل المخدرات تقتل متعاطيها وكيف؟ للإجابة على هذا التساؤل، سنتعرض في هذا الفيديو للمخدرات بمختلف أنواعها بداية من المسكنات وصولاً إلى الأفيونات والمورفينات وكوكتيلات المخدرات وكذلك المخدرات المزيفة والكوكايين والمنشطات .. إلخ ..
سنتعرف على اضرار المخدرات وكيف أن جرعة واحدة من بعض الأنواع قد تفضي إلى الموت المفاجئ.
المحتوى
ليه المخدرات مميته وقاتله، و إزاي بتقتل المخدرات متعاطيها ؟!
في البدايه هنتكلم عن الادويه بشكل عام وخصوصا المسكنه والمغيره للمزاج وطبعا المخدره :
الأدوية المسكنة
الأدوية المسكنة القويه والمخدره مثلا بتخفف الألم وبتسبب الشعور بالسعادة . لكن في نفس الوقت خطيرة جدا مع الجرعات العاليه منها. وبتوصل خطورتها لدرجة انها ممكن تسبب تسمم و تعطل وظائف الجسم الاساسيه.
فى احصائيه اتعملت عام 2013 .. يتوضح ان عدد الوفيات بالتسمم الناتج عن الجرعات الزايدة من المخدرات تجاوز عدد الوفيات نتيجه حوادث السيارات . والغريب في الأمر ان نسبه كبيره من وفيات حوادث السيارات اعتبرت ناتجه عن التسمم مش اي سبب تاني . ودا بسبب ان لما فحصوا السائقيين اكتشفوا انهم مصابين بتسمم فى الدم من الادويه والمخدرات وبجرعات عاليه.
ومش بس الأشخاص المدمنين أو الي بيعانوا من اضطرابات تعاطي المخدرات هما اللي في خطر، لكن أي شخص خد جرعة زايده بما فيهم المستخدمين لأول مرة ممكن برضه يتعرضوا لخطر التسمم او الموت او الاصابه بمرض نفسى .. حتى من جرعه واحده كبيره ؟ نعم !!
تابع الفيديو للاخر علشان تتعرف على الي بيحصل أثناء تناول جرعة زايدة من المواد المخدره المختلفه وتفاعلها وتأثيرها على الجسم والوظايف ..
اولا المواد الأفيونية
بترتبط الأفيونيات بمستقبلات في جذع الدماغ . ودى بتأثر على عمليه التنفس. وبتسبب المورفينات إبطاء شديد في التنفس .. وخلال الجرعة الزايدة، ممكن الشخص يتوقف عن التنفس تمامًا و بيحصل اختناق ممكن يوصل للوفاه .. وده فعلا اللى بيحصل لمدمنى المورفينات ..
بتتصدر المواد الأفيونية قائمة الأدوية والمخدرات اللي بتسبب الوفيات المرتبطة بالجرعة الزايدة .. وبترتبط المواد الأفيونية بالمستقبلات اللي في منطقة المخ الي بتتحكم في التنفس .. وبتمنع إشارات المخ المسئوله عن الاستنشاق والزفير .. ولو كانت الجرعة مرتفعة جدًا بيقف التنفس تمامًا .. وبالتالي بيسبب الوفاة خلال دقايق ..
تعتبر المواد الأفيونية خطيرة بشكل خاص لأن الاحساس بالسعادة الزائفة مع الاستخدام بتأثر بمعدلات مختلفة على مناطق مختلفة من الدماغ .. ومع مرور الوقت بتبدا الجرعة اللازمة لتخفيف الألم والاحساس بالسعاده تزيد تدريجيا لحد ما تقرب من الجرعة المميتة .. و مع اتساع مستقبلات المورفينات في المخ بيبدأ المتعاطى بالاحساس للحاجه للمزيد لانه سريعا ما يضيع الاحساس بالمخدر ..
وكمان بيحصل التسمم والموت لما بيقف الشخص عن تعاطي المخدرات فترة من الزمن نتيجه ظروف معينه .. وبعدين يبدأ يتعاطي من جديد بنفس الجرعة اللي استخدمها اخر مرة ..
واتطور سوق المورفينات الطبيعيه وتم استبدالها بالاصطناعيه لزياده الطلب .. خصوصا ان الافيونات الاصطناعيه المخلقه اقوى مئات المرات من المورفين الطبيعى.
في عام 2010 أصبحت المواد الأفيونية الاصطناعية المصممة للاستخدام في المستشفيات متاحة على نطاق أوسع في الأسواق غير القانونية أكتر من الافيونات الطبيعيه ..
وبحلول عام 2016 أصبحت المواد الأفيونية الاصطناعية اكتر العقاقير المسببة للوفيات المرتبطة بالجرعة الزائدة في الولايات المتحدة.
بدأ يظهر فى الاسواق عقار مضاد للمورفينات اسمه النالكسون .. وهو لطرد المورفينات اثناء الجرعات العاليه ولغلق مستقبلات المورفينات بالمخ ..
لكن مازال العقار تحت التجربه وبيستخدم فى الافاقه بعد العمليات الجراحيه بس .. ومتمش تسجيله فى كتيرا من الدول بشكل رسمى .. كمان ظهرت خطورته فى حالات الادمان لما بيتعاطى المدمن كميات كبيره من المورفينات للتحايل على تأثير الدواء دا داخل الجسم واللي بيسبب التسمم والوفاه.
ثانيا كوكتيلات المخدرات
كتير من حالات التسمم بتكون نتيجة خليط لأكتر من دواء .. احيانا بيكون خليط من المخدرات والادويه العاديه والكحول. في معظم الحالات دي مفيش دواء واحد هو المتسبب فى التسمم.
لكن التأثير المشترك لكوكتيل المخدرات هو الي بيخليه خطير ومميت ..
الكحول والأفيونيات هما مزيج قاتل بشكل خاص لان كل واحد منهم بيشتغل علي جذع الدماغ لإبطاء التنفس .. لكن كل واحد منهم بيشتغل من خلال آليات مختلفة.
عادة بتتلقى الخلايا العصبية في جذع الدماغ توازنًا بين الإشارات المثيرة والمثبطة .. واللي بتخلينا نتنفس بمعدل مناسب.
هنا بيعمل الكحول على التثبيط و تقليل إشارات الإثارة والانتباه.
وبإضافه المواد الأفيونية بتخلي الخلايا العصبية اضعف في الاستجابه.
الكحول والمواد الأفيونية بياثروا بقوة علي قمع التنفس .. و من غير أكسجين بتتلف الأعضاء والأنسجة . وعادة بتتأثر الدماغ أولاً .. وفي بعض الاحيان بيكون الضرر غير قابل للعلاج.
ثالثا المخدرات المزيفة
المقصود هنا بالمخدرات المزيفه هو اضافه مواد ومخدرات على انواع مخدره تانيه لزياده مفعولها او لزياده الكميه.
فلما بيكون المخدر اصطناعى وخارج جداول الادويه بيكون من الصعب جدا االتعرف علي المواد المستخدمة في تصنيعه و طريقة تصنيعه. وممكن تتحول الجرعات العاديه لجرعات زايده وقاتله ..
خصوصا ان بيتم اضافة مواد مختلفه على المخدرات خلال التصنيع غير المشروع بنسب عشوائيه ممكن تسبب فى الوفاه ..
مثال علي كدة :-
اضافة أملاح الاستحمام المعروفة باسم الكاثينون الصناعي للكوكايين أو الميثامفيتامين لزيادة النشوه بكميات غير منضبطه.
كمان الفنتانيل المصنع بطريقة غير مشروعة كمادة أفيونية .. بيضاف علي الهيروين أو الكوكايين أو الماريجوانا .. وقوه الفنتانيل من 50-100 ضعف المورفينات الطبيعيه.
وغالبا بتحتوي المواد الي بتتباع على أنها عقار MDMA او عقار النشوة . على مواد مخدره مختلفه مخلوطه عشوائيا وبتختلف من مصدر للتاني.
المخدرات دى بتعتبر خطيرة جدا لأن من الصعب قياسها.
فالأشخاص الي بيخلطوا الجرعات دي مع بعض بيضيفوا كميات متنوعه و بشكل غير متساوي .. و دا بيخلي الجرعات دي غير دقيقة.. و في الحالة دي من السهل تناول كمية مميتة بدون قصد .
رابعا الكوكايين و المنشطات
المنشطات بتشمل الكوكايين والميث امفيتامين و MDMA او حبوب النشوة واللي بتزود من مستويات مش بس الدوبامين والاحساس بالسعاده لكن كمان بتزود من النشاط الكلي للشخص.
وبتزود من معدل ضربات القلب وضغط الدم وتضييق الأوعية الدموية.
وفي المستويات العالية ممكن أنها تسبب نوبة قلبية وارتفاع درجة حرارة الجسم وتلف في المخ.
حتى بعد تناول جرعة منخفضة من الكوكايين .. بيكون احتمال إصابة الشخص بنوبة قلبية 24 مرة أكتر من المعتاد..
الجرعات المنخفضه من الكريستال ميث بتزود من احتماليه الاصابه بنوبات ذهان واضطرابات نفسيه بعضها ممكن يتحول لمرض مزمن.
ده كان عرض سريع عن تأثير تعاطى المخدرات على المستخدم وانها ممكن جدا تكون قاتلة حتى مع الجرعات العاديه ..
ودايما بنوصى بالابتعاد عن تجربه المخدرات لان تجربه واحده ممكن تؤثر على مسار حياتك ..
واذا كنت قد اخطات بالتجربه فعليك انك توقف فورا وتطلب المساعده من المختصين ..
تم التحديث في 7 أبريل,2022 بواسطة موسوعة الإدمان